PRIME INDIAN NEWS✍️H S CHAWLA
ਅੰਮ੍ਰਿਤਸਰ, (PIN):- ਸਿੱਖ ਸੇਵਕ ਸੁਸਾਇਟੀ ਇੰਟਰਨੈਸ਼ਨਲ ਵੱਲੋਂ ਅੰਮ੍ਰਿਤਸਰ ਵਿਖੇ ਆਯੋਜਿਤ ਇੱਕ ਖਾਸ ਸਮਾਗਮ ਵਿਚ ਬਜ਼ੁਰਗ ਕਿਰਤੀ ਗੁਰਸਿੱਖਾਂ ਨੂੰ ਰਿਕਸ਼ੇ ਵੰਡ ਕੇ ਰੋਜ਼ਗਾਰ ਦਾ ਸਹਾਰਾ ਦਿੱਤਾ ਗਿਆ। ਇਸ ਉਪਰਾਲੇ ਰਾਹੀਂ ਉਨ੍ਹਾਂ ਗੁਰਸਿੱਖਾਂ ਨੂੰ ਆਪਣੇ ਪਰਿਵਾਰ ਦੀ ਸੰਭਾਲ ਕਰਨ ਯੋਗ ਬਣਾਇਆ ਗਿਆ ਜੋ ਸਾਲਾਂ ਤੋਂ ਮਿਹਨਤ-ਮਜ਼ਦੂਰੀ ਕਰਕੇ ਗੁਜ਼ਾਰਾ ਕਰ ਰਹੇ ਸਨ।ਸਮਾਗਮ ਦੀ ਸਭ ਤੋਂ ਖਾਸ ਤੇ ਪ੍ਰੇਰਨਾਦਾਇਕ ਗੱਲ ਇਹ ਰਹੀ ਕਿ ਜਿਨ੍ਹਾਂ ਗੁਰਸਿੱਖਾਂ ਨੂੰ ਰਿਕਸ਼ੇ ਦਿੱਤੇ ਗਏ, ਉਹ ਸਾਰੇ ਹੀ ਸਾਬਤ-ਸੂਰਤ ਸਨ। ਉਨ੍ਹਾਂ ਵਿਚੋਂ ਬਹੁਤੇ ਪੂਰਨ ਬਾਣੇ ਵਿਚ ਸਨ। ਕੇਸਾਂ, ਦਾੜ੍ਹੀ ਤੇ ਬਾਣੇ ਦੀ ਪੂਰੀ ਰਹਿਤ ਰੱਖਦੇ ਹੋਏ ਇਹ ਗੁਰਸਿੱਖ ਰੋਜ਼ਾਨਾ ਰਿਕਸ਼ਾ ਚਲਾ ਕੇ ਆਪਣੇ ਪਰਿਵਾਰ ਦਾ ਪਾਲਣ-ਪੋਸ਼ਣ ਕਰ ਰਹੇ ਸਨ। ਇਸ ਉਪਰਾਲੇ ਨਾਲ ਉਨ੍ਹਾਂ ਦੀ ਮਿਹਨਤ ਨੂੰ ਇੱਕ ਨਵੀਂ ਤਾਕਤ ਮਿਲੀ ਹੈ।
ਇਨ੍ਹਾਂ ਲਾਭਪਾਤਰੀਆਂ ਵਿਚ ਇੱਕ ਅਜਿਹਾ ਬਜ਼ੁਰਗ ਵੀ ਸ਼ਾਮਲ ਸੀ ਜਿਸ ਦੀ ਇੱਕ ਬਾਂਹ ਨਹੀਂ ਹੈ। ਇੱਕ ਹੱਥ ਨਾਲ ਰਿਕਸ਼ਾ ਚਲਾਉਣਾ ਆਮ ਗੱਲ ਨਹੀਂ। ਫਿਰ ਵੀ ਇਸ ਗੁਰਸਿੱਖ ਨੇ ਪਿਛਲੇ 25 ਸਾਲਾਂ ਤੋਂ ਗੁਰੂ ਨਾਨਕ ਸਾਹਿਬ ਜੀ ਦੇ ਉਪਦੇਸ਼ਾਂ ’ਤੇ ਚੱਲਦਿਆਂ ਮਿਹਨਤ-ਮਜ਼ਦੂਰੀ ਨਾਲ ਰਿਕਸ਼ਾ ਚਲਾ ਕੇ ਆਪਣੇ ਪਰਿਵਾਰ ਦਾ ਪਾਲਣ-ਪੋਸ਼ਣ ਕੀਤਾ। ਸੁਸਾਇਟੀ ਵੱਲੋਂ ਉਸ ਨੂੰ ਰਿਕਸ਼ਾ ਦੇ ਕੇ ਉਸ ਦੀ ਸੇਵਾ ਨੂੰ ਮਾਨਤਾ ਦਿੱਤੀ ਗਈ। ਦੱਸਣਯੋਗ ਹੈ ਕਿ ਇਹ ਰਿਕਸ਼ਾ ਵਾਲੇ ਜ਼ਿਆਦਾਤਰ ਬੱਸ ਅੱਡੇ ਤੇ ਰੇਲਵੇ ਸਟੇਸ਼ਨ ਤੋਂ ਸ਼ਰਧਾਲੂਆਂ ਨੂੰ ਸ੍ਰੀ ਦਰਬਾਰ ਸਾਹਿਬ ਤੇ ਗੁਰਦੁਆਰਾ ਸ਼ਹੀਦਾਂ ਸਾਹਿਬ ਦੇ ਦਰਸ਼ਨਾਂ ਲਈ ਲਿਜਾਣ ਦੀ ਸੇਵਾ ਕਰਦੇ ਹਨ।
ਲੋੜਮੰਦਾਂ ਨੂੰ ਰਿਕਸ਼ੇ ਦੇਣ ਸਮੇਂ ਜਥੇਦਾਰ ਪਰਮਿੰਦਰਪਾਲ ਸਿੰਘ ਖਾਲਸਾ ਨੇ ਸਮੁੱਚੇ ਤੋਰ ਤੇ ਸਾਰੇ ਰਿਕਸ਼ਾ ਚਾਲਕਾ ਨੂੰ ਬੇਨਤੀ ਕੀਤੀ, ਪ੍ਰਤੀਦਿਨ ਪਹਿਲਾ ਪੈਡਲ ਮਾਰਨ ਵਕ਼ਤ ਮੂਲ ਮੰਤਰ ਸਾਹਿਬ ਦਾ ਪਾਠ ਅਤੇ ਸਿਮਰਨ ਕਰਕੇ ਅਪਣੇ ਕਮ ਦੀ ਸ਼ੁਰੁਆਤ ਕਰਨੀ, ਇਸ ਬੇਨਤੀ ਨੂੰ ਪ੍ਰਵਾਨ ਕਰਦਿਆਂ ਸਾਰੇ ਰਿਕਸ਼ਾ ਵਾਲਿਆਂ ਨੇ ਜੈਕਾਰੇ ਛਡ ਕੇ ਪ੍ਰਵਾਨਗੀ ਦਿੱਤੀ। ਸਮਾਗਮ ਦੀ ਸ਼ੁਰੂਆਤ ਗੁਰਦੁਆਰਾ ਸਾਰਾਗੜ੍ਹੀ ਸਾਹਿਬ ਵਿਖੇ ਸਰਦਾਰ ਪ੍ਰਿਤਪਾਲ ਸਿੰਘ ਜੀ ਵੱਲੋਂ ਚੜ੍ਹਦੀ ਕਲਾ ਦੀ ਅਰਦਾਸ ਨਾਲ ਹੋਈ। ਸਮਾਪਤੀ ਮੌਕੇ ਵੀ ਅਰਦਾਸ ਕੀਤੀ ਗਈ। ਉਪਰੰਤ ਜੱਥੇਦਾਰ ਪਰਮਿੰਦਰਪਾਲ ਸਿੰਘ ਖ਼ਾਲਸਾ ਜੀ ਨੇ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਤੋਂ ਪਵਿੱਤਰ ਹੁਕਮਨਾਮਾ ਲਿਆ। ਹੁਕਮਨਾਮੇ ਨੇ ਸਾਰੀ ਸੰਗਤ ਨੂੰ ਗੁਰਮਤਿ ਦੀ ਰਾਹ ਦੱਸੀ ਤੇ ਸੇਵਾ ਭਾਵਨਾ ਨੂੰ ਹੋਰ ਮਜ਼ਬੂਤ ਕੀਤਾ।
ਸਿੱਖ ਸੇਵਕ ਸੁਸਾਇਟੀ ਇੰਟਰਨੈਸ਼ਨਲ ਦੇ ਮੁੱਖ ਸੇਵਾਦਾਰ ਜੱਥੇਦਾਰ ਪਰਮਿੰਦਰਪਾਲ ਸਿੰਘ ਖ਼ਾਲਸਾ ਨੇ ਦੱਸਿਆ ਕਿ ਸੁਸਾਇਟੀ ਵੱਲੋਂ ਪਿਛਲੇ 15 ਸਾਲਾਂ ਤੋਂ ਮਾਨਵਤਾ ਦੀ ਨਿਸ਼ਕਾਮ ਸੇਵਾ ਕੀਤੀ ਜਾ ਰਹੀ ਹੈ। ਉਨ੍ਹਾਂ ਕਿਹਾ, “ਇਹ ਸੰਸਥਾ ‘ਸਰਬੱਤ ਦਾ ਭਲਾ’ ਦੇ ਸਿਧਾਂਤ ’ਤੇ ਪਹਿਰਾ ਦਿੰਦਿਆਂ ਦੁਨੀਆ ਭਰ ਵਿਚ ਕੁਦਰਤੀ ਆਫ਼ਤਾਂ ਜਿਵੇਂ ਹੜ੍ਹ, ਤੂਫ਼ਾਨ ਤੇ ਬਿਮਾਰੀਆਂ ਵਿਚ ਫਸੇ ਬੇਗੁਨਾਹਾਂ ਦੀ ਮਦਦ ਕਰ ਰਹੀ ਹੈ। ਸਾਫ਼ ਪਾਣੀ, ਸਿਹਤ ਤੇ ਖਾਣ-ਪੀਣ ਦੀਆਂ ਲੋੜਾਂ ਪੂਰੀਆਂ ਕਰਕੇ ਸੰਸਥਾ ਅੱਜ ਦਇਆ, ਨਿਮਰਤਾ ਤੇ ਇਨਸਾਨੀਅਤ ਦੀ ਜੀਵੰਤ ਮਿਸਾਲ ਬਣ ਚੁੱਕੀ ਹੈ।
”ਉਨ੍ਹਾਂ ਅੱਗੇ ਕਿਹਾ ਕਿ ਸੁਸਾਇਟੀ ਦਾ ਮਕਸਦ ਗੁਰੂ ਸਾਹਿਬ ਦੇ ਹੁਕਮ ਅਨੁਸਾਰ ਸੇਵਾ ਕਰਨਾ ਹੈ। ਜਦੋਂ ਕੋਈ ਗੁਰਸਿੱਖ ਮਿਹਨਤ ਕਰਦਾ ਹੋਇਆ ਵੀ ਮੁਸ਼ਕਲ ਵਿਚ ਹੋਵੇ ਤਾਂ ਉਸ ਦੀ ਮਦਦ ਕਰਨਾ ਪੰਥ ਦੀ ਜ਼ਿੰਮੇਵਾਰੀ ਹੈ। ਇਸ ਸਮਾਗਮ ਰਾਹੀਂ ਉਸ ਜ਼ਿੰਮੇਵਾਰੀ ਨੂੰ ਨਿਭਾਉਣ ਦੀ ਕੋਸ਼ਿਸ਼ ਕੀਤੀ ਗਈ ਹੈ।
ਸਮਾਗਮ ਵਿਚ ਵੱਡੀ ਗਿਣਤੀ ਵਿਚ ਪੰਥਕ ਤੇ ਸਮਾਜਿਕ ਸ਼ਖ਼ਸੀਅਤਾਂ ਨੇ ਹਾਜ਼ਰੀ ਭਰੀ। ਮੁੱਖ ਤੌਰ ’ਤੇ ਮਨਜੀਤ ਸਿੰਘ (ਗਤਕਾ ਮਾਸਟਰ), ਭਾਈ ਤਜਿੰਦਰ ਸਿੰਘ (ਆਇਰਨ ਵਾਲੇ), ਭਾਈ ਹਰਜਿੰਦਰ ਸਿੰਘ ਜਿੰਦਾ, ਸਰਦਾਰ ਮਨਵਿੰਦਰ ਸਿੰਘ ਵਿੱਕੀ, ਸਰਦਾਰ ਗੁਰਪਾਲ ਸਿੰਘ ਰਾਜੂ, ਸਰਦਾਰ ਤਜਿੰਦਰ ਸਿੰਘ ਲਵਲੀ, ਸਰਦਾਰ ਗੁਰਮੀਤ ਸਿੰਘ ਬੌਬੀ, ਸਰਦਾਰ ਸੁਖਦੇਵ ਸਿੰਘ ਸੁੱਖਾ, ਸਿਮਰਨਜੀਤ ਸਿੰਘ ਨੋਨੀ, ਭਾਈ ਜਤਿੰਦਰ ਸਿੰਘ ਬੱਬੂ ਭਾਟੀਆ, ਸੰਦੀਪ ਸਿੰਘ ਬੰਨੀ ਚਾਵਲਾ, ਬਲਜੀਤ ਸਿੰਘ (ਜ਼ੋਨਲ ਇੰਚਾਰਜ, ਸਿੱਖ ਮਿਸ਼ਨਰੀ ਕਾਲਜ), ਹਰਦੇਵ ਸਿੰਘ ਗਰਚਾ, ਗੁਰਪ੍ਰੀਤ ਸਿੰਘ ਰਾਜੂ (ਡੀਲਕਸ ਸੈਨਟਰੀ), ਸੁਖਵਿੰਦਰ ਸਿੰਘ ਗੋਗੀ (ਦਿੱਲੀ ਪੇਂਟਸ), ਪ੍ਰਿਤਪਾਲ ਸਿੰਘ (ਐਸ.ਬੀ.ਆਈ. ਬੈਂਕ), ਮਨਦੀਪ ਸਿੰਘ (ਪ੍ਰਿੰਸੀਪਲ, ਜ਼ੀਰੋ ਫੀਸ ਸਕੂਲ) ਤੇ ਹੋਰ ਕਈ ਗੁਰਸਿੱਖ ਸੰਗਤਾਂ ਮੌਜੂਦ ਸਨ।
ਅੰਮ੍ਰਿਤਸਰ ਦੀਆਂ ਸੰਗਤਾਂ ਨੇ ਸੁਸਾਇਟੀ ਦੇ ਇਸ ਉਪਰਾਲੇ ਦੀ ਭਰਪੂਰ ਸ਼ਲਾਘਾ ਕਰਦਿਆਂ ਕਿਹਾ ਕਿ ਅੱਜਕੱਲ੍ਹ ਜਦੋਂ ਬਹੁਤੇ ਲੋਕ ਸਿਰਫ਼ ਆਪਣੇ ਹਿੱਤਾਂ ਬਾਰੇ ਸੋਚਦੇ ਹਨ, ਉਸ ਵੇਲੇ ਅਜਿਹੀਆਂ ਸੰਸਥਾਵਾਂ ਗੁਰੂ ਸਾਹਿਬ ਦੇ ਸੰਦੇਸ਼ ਨੂੰ ਜੀਵੰਤ ਰੱਖਦੀਆਂ ਹਨ। ਉਥੋਂ ਦੇ ਦੁਕਾਨਦਾਰਾਂ ਨੇ ਕਿਹਾ ਕਿ ਅਜਿਹੇ ਕੰਮ ਹੋਰ ਵੀ ਹੋਣੇ ਚਾਹੀਦੇ ਹਨ ਤਾਂ ਜੋ ਗੁਰਸਿੱਖੀ ਰਹਿਤ ਰੱਖਣ ਵਾਲੇ ਕਿਰਤੀ ਭਰਾਵਾਂ ਨੂੰ ਸਹਾਰਾ ਮਿਲਦਾ ਰਹੇ। ਜਥੇਦਾਰ ਖਾਲਸਾ ਨੇ ਵਾਅਦਾ ਕੀਤਾ ਹੈ ਕਿ ਅਜਿਹੀਆਂ ਸੇਵਾਵਾਂ ਭਵਿੱਖ ਵਿਚ ਵੀ ਜਾਰੀ ਰਹਿਣਗੀਆਂ।
ਗੌਰਤਲਬ ਹੈ ਕਿ ਇਸ ਸਮਾਗਮ ਨੇ ਇੱਕ ਵਾਰ ਫਿਰ ਇਹ ਸਾਬਤ ਕਰ ਦਿੱਤਾ ਹੈ ਕਿ ਗੁਰੂ ਨਾਨਕ ਸਾਹਿਬ ਜੀ ਦਾ ਉਪਦੇਸ਼ “ਕਿਰਤ ਕਰੋ, ਨਾਮ ਜਪੋ, ਵੰਡ ਛਕੋ” ਅੱਜ ਵੀ ਜੀਵੰਤ ਹੈ। ਜੋ ਗੁਰਸਿੱਖ ਮਿਹਨਤ ਕਰਦੇ ਹੋਏ ਵੀ ਗੁਰਮਤਿ ’ਤੇ ਅਟੱਲ ਰਹਿੰਦੇ ਹਨ, ਉਨ੍ਹਾਂ ਦੀ ਸੇਵਾ ਕਰਨਾ ਹਰ ਸਿੱਖ ਦਾ ਫਰਜ਼ ਹੈ। ਸਿੱਖ ਸੇਵਕ ਸੁਸਾਇਟੀ ਇੰਟਰਨੈਸ਼ਨਲ ਨੇ ਇਸ ਫਰਜ਼ ਨੂੰ ਨਿਭਾਉਣ ਦਾ ਇੱਕ ਸੁੰਦਰ ਉਦਾਹਰਣ ਪੇਸ਼ ਕੀਤਾ ਹੈ।
