ਜਲੰਧਰ, ਐਚ ਐਸ ਚਾਵਲਾ। ਕਮਾਂਡਿੰਗ ਅਫ਼ਸਰ ਕਰਨਲ ਵਿਨੋਦ ਜੋਸ਼ੀ ਦੀ ਅਗਵਾਈ ਹੇਠ 2 ਪੰਜਾਬ ਐੱਨ.ਸੀ.ਸੀ. ਬਟਾਲੀਅਨ, ਜਲੰਧਰ ਵੱਲੋਂ ਇੱਕ ਸ਼ਾਨਦਾਰ ਸਨਮਾਨ ਸਮਾਰੋਹ ਦਾ ਆਯੋਜਨ ਕੀਤਾ ਗਿਆ, ਜਿਸ ਵਿੱਚ ਵੱਖ ਵੱਖ ਖੇਤਰਾਂ ਵਿੱਚ ਵਧੀਆ ਪ੍ਰਦਰਸ਼ਨ ਕਰਨ ਵਾਲੇ ਐੱਨ.ਸੀ.ਸੀ. ਅਧਿਕਾਰੀਆਂ ਦਾ ਸਨਮਾਨ ਕੀਤਾ ਗਿਆ। ਕਮਾਂਡਿੰਗ ਅਫ਼ਸਰ ਕਰਨਲ ਵਿਨੋਦ ਜੋਸ਼ੀ ਨੇ ਕਿਹਾ ਕਿ ਇਸ ਸਮਾਰੋਹ ਰਾਹੀਂ ਅਧਿਕਾਰੀਆਂ ਅਤੇ ਕੈਡਿਟਾਂ ਦੇ ਸਮਰਪਣ ਤੇ ਸਖ਼ਤ ਮਿਹਨਤ ਨੂੰ ਮਾਨਤਾ ਦਿੱਤੀ ਗਈ ਹੈ। ਲਾਇਲਪੁਰ ਖ਼ਾਲਸਾ ਕਾਲਜ ਦੇ ਲੈਫਟੀਨੈਂਟ (ਡਾ.) ਕਰਨਬੀਰ ਸਿੰਘ ਨੂੰ ਉਨ੍ਹਾਂ ਦੀ ਮਿਸਾਲੀ ਸੇਵਾ ਅਤੇ ਅਗਵਾਈ ਲਈ ਵੱਕਾਰੀ ਡਾਇਰੈਕਟਰ ਜਨਰਲ ਐੱਨ.ਸੀ.ਸੀ. ਪ੍ਰਸ਼ੰਸਾ ਪੱਤਰ ਪ੍ਰਦਾਨ ਕੀਤਾ ਗਿਆ। ਸੂਬੇਦਾਰ ਰਾਜਿੰਦਰ ਸਿੰਘ ਨੂੰ ਕੈਡਿਟਾਂ ਦੀ ਸਿਖਲਾਈ ਦੇਣ ਵਿੱਚ ਉਨ੍ਹਾਂ ਦੇ ਸ਼ਾਨਦਾਰ ਯੋਗਦਾਨ ਲਈ ਦੱਖਣੀ ਪੱਛਮੀ ਆਰਮੀ ਕਮਾਂਡਰ ਪ੍ਰਸ਼ੰਸਾ ਪੱਤਰ ਨਾਲ ਸਨਮਾਨਿਤ ਕੀਤਾ ਗਿਆ।
ਇਸੇ ਸਮਾਰੋਹ ਵਿਚ ਕਰਨਲ ਜੋਸ਼ੀ ਨੇ ਦੱਸਿਆ ਕਿ ਦੋ ਕੈਡਿਟਸ ਭਾਰਤੀ ਸੈਨਾ ਵਿਚ ਕਮਿਸ਼ਨਡ ਅਫ਼ਸਰ ਬਣਨ ਦੇ ਇਮਤਿਹਾਨ ਪਾਸ ਕਰ ਚੁੱਕੇ ਹਨ। ਆਰਮੀ ਪਬਲਿਕ ਸਕੂਲ ਦੇ ਕੈਡਿਟ ਆਯੁਸ਼ ਕੁਮਾਰ ਨੇ ਐਨ.ਡੀ.ਏ.-154 ਲਈ ਐਸ.ਐਸ.ਬੀ. ਬੋਰਡ ਨੂੰ ਸਫਲਤਾਪੂਰਵਕ ਪਾਸ ਕੀਤਾ ਹੈ। ਆਰਮੀ ਪਬਲਿਕ ਸਕੂਲ ਦੇ ਹੀ ਕੈਡੇਟ ਦੀਪਾਂਸ਼ੂ ਸ਼ਰਮਾ ਨੇ ਵੀ ਆਪਣੀ ਪ੍ਰਤਿਭਾ ਦਾ ਪ੍ਰਦਰਸ਼ਨ ਕਰਦੇ ਹੋਏ ਐਨ.ਡੀ.ਏ.-154 ਅਤੇ 10+2 ਤਕਨੀਕੀ ਐਂਟਰੀ-53 ਨੂੰ ਪਾਸ ਕੀਤਾ ਹੈ। ਕੈਡਿਟ ਆਯੁਸ਼ ਕੁਮਾਰ ਅਤੇ ਕੈਡੇਟ ਦੀਪਾਂਸ਼ੂ ਸ਼ਰਮਾ ਨੂੰ ਕਰਨਲ ਵਿਨੋਦ ਜੋਸ਼ੀ ਨੇ ਆਪਣੇ ਮਾਰਗਦਰਸ਼ਨ ਹੇਠ ਐਸਐਸਬੀ ਇੰਟਰਵਿਊ ਪ੍ਰਕਿਰਿਆ ਲਈ ਸਿਖਲਾਈ ਦਿੱਤੀ ਸੀ।
ਐਸੋਸੀਏਟ ਐਨਸੀਸੀ ਅਧਿਕਾਰੀਆਂ ਅਤੇ ਫੌਜ ਦੇ ਕਰਮਚਾਰੀਆਂ ਨਾਲ ਤਿਮਾਹੀ ਏਐਨਓ ਕਾਨਫਰੰਸ ਦੌਰਾਨ ਆਪਣੀ ਗੱਲਬਾਤ ਵਿੱਚ, ਕਰਨਲ ਜੋਸ਼ੀ ਨੇ ਬਟਾਲੀਅਨ ਦੇ ਭਵਿੱਖ ਦੇ ਕੈਂਪਾਂ, ਔਨਲਾਈਨ ਨਾਮਾਂਕਣ ਅਤੇ ਸਿਖਲਾਈ ਪ੍ਰੋਗਰਾਮਾਂ ਬਾਰੇ ਦੱਸਿਆ। ਸਮਾਰੋਹ ਦਾ ਅੰਤ ਚਾਹ ਪਾਰਟੀ ਦੇ ਨਾਲ ਹੋਇਆ। ਇਸ ਸਮਾਗਮ ਨੇ 2 ਪੰਜਾਬ ਐਨਸੀਸੀ ਬਟਾਲੀਅਨ ਦੀ ਅਗਵਾਈ ਹੇਠ ਪ੍ਰਾਪਤੀਆਂ ਕਰ ਰਹੇ ਕੈਡਿਟਸ ਅਤੇ ਅਧਿਕਾਰੀਆਂ ਨੂੰ ਉਤਸ਼ਾਹਿਤ ਕੀਤਾ ਹੈ।
