ਜਲੰਧਰ, ਐਚ ਐਸ ਚਾਵਲਾ। ਮੇਜਰ ਜਨਰਲ ਜੇ. ਐੱਸ. ਚੀਮਾ ਐਨਸੀਸੀ ਦੇ ਗਰੁੱਪ ਹੈੱਡਕੁਆਰਟਰ ਜਲੰਧਰ ਵਿਚ ਸਾਲਾਨਾ ਨਿਰੀਖਣ ਲਈ ਪਹੁੰਚੇ। ਉਨ੍ਹਾਂ ਨੇ ਉਥੇ ਸਾਲ ਭਰ ਦੀਆਂ ਐਨਸੀਸੀ ਗਤਿਵਿਧੀਆਂ ਦਾ ਬਰੀਕੀ ਨਾਲ ਜਾਇਜ਼ਾ ਲਿਆ ਅਤੇ ਫੌਜੀ ਅਧਿਕਾਰੀਆਂ ਨੂੰ ਭਵਿੱਖ ਲਈ ਨਿਰਦੇਸ਼ ਜਾਰੀ ਕੀਤੇ। ਇਸ ਤੋਂ ਬਾਅਦ ਜਨਰਲ ਅਧਿਕਾਰੀ ਚੀਮਾ ਨੇ ਸੀਟੀ ਇੰਸਟੀਚਿਊਟ ‘ਚ ਚੱਲ ਰਹੇ ਸੀਏਟੀਸੀ-40 ਕੈਂਪ ਦਾ ਦੌਰਾ ਕੀਤਾ। ਉਨ੍ਹਾਂ ਨੂੰ ਉਥੇ ਗਾਰਡ ਆਫ ਆਨਰ ਦਿੱਤਾ ਗਿਆ।
ਉਨ੍ਹਾਂ ਨੇ ਕੈਂਪ ਵਿਚ ਟ੍ਰੇਨਿੰਗ ਦੇ ਰਹੇ ਏਐਨਓਜ਼, ਫੌਜ ਦੇ ਪ੍ਰਸ਼ਿਕਸ਼ਕਾਂ ਅਤੇ ਚੁਣੇ ਹੋਏ ਐਨਸੀਸੀ ਕੈਡਟਸ ਨਾਲ ਮੁਲਾਕਾਤ ਕੀਤੀ। ਕੈਂਪ ਕਮਾਂਡੇਂਟ ਕਰਣਲ ਵਿਨੋਦ ਜੋਸ਼ੀ ਨੇ ਉਨ੍ਹਾਂ ਨੂੰ ਇਕ ਵੀਡੀਓ ਰਾਹੀਂ ਕੈਂਪ ਵਿਚ ਚੱਲ ਰਹੀ ਟ੍ਰੇਨਿੰਗ ਬਾਰੇ ਵਿਸਥਾਰ ਨਾਲ ਜਾਣਕਾਰੀ ਦਿੱਤੀ। ਕਰਣਲ ਜੋਸ਼ੀ ਨੇ ਦੱਸਿਆ ਕਿ ਐਸਡੀਆਰਐੱਫ. ਟੀਮ ਵਲੋਂ ਕੈਡਟਸ ਨੂੰ ਇਕ ਵਿਸ਼ੇਸ਼ ਲੈਕਚਰ ਰਾਹੀਂ ਦੱਸਿਆ ਗਿਆ ਕਿ ਆਫ਼ਤ ਵੇਲੇ ਕਿਵੇਂ ਜ਼ਖ਼ਮੀਆਂ ਦੀ ਸਹਾਇਤਾ ਕੀਤੀ ਜਾਂਦੀ ਹੈ। ਫਾਇਰ ਬ੍ਰਿਗੇਡ ਵਲੋਂ ਦਿੱਤੇ ਲੈਕਚਰ ‘ਚ ਅੱਗ ਦੇ ਕਿਸਮਾਂ ਅਤੇ ਬੇਕਾਬੂ ਅੱਗ ਨੂੰ ਕੰਟਰੋਲ ਕਰਨ ਦੇ ਤਰੀਕੇ ਦੱਸੇ ਗਏ।
ਕੈਂਪ ਵਿਚ ਕੇਅਰ ਟੇਕਰ ਅਫਸਰ ਓਰੀਐਂਟੇਸ਼ਨ ਪ੍ਰੋਗਰਾਮ ਰਾਹੀਂ ਸੀਟੀਓਜ਼ ਨੂੰ ਪੀਆਰਸੀਐੱਨ ਕੋਰਸ ਲਈ ਤਿਆਰ ਕੀਤਾ ਜਾ ਰਿਹਾ ਹੈ। ਗਰਲਜ਼ ਕੈਡਟਸ ਦੀ ਸਿਹਤ ਅਤੇ ਸਫਾਈ ਨਾਲ ਜੁੜੇ ਸਾਰੇ ਸਵਾਲਾਂ ਦੇ ਜਵਾਬ ਦੇਣ ਲਈ ਇੱਕ ਮਹਿਲਾ ਰੋਗ ਮਾਹਿਰ ਦੁਆਰਾ ਵਿਸ਼ੇਸ਼ ਲੈਕਚਰ ਦਿੱਤਾ ਗਿਆ। ਜਦੋਂ ਕੈਡਟਸ ਨੂੰ ਸੈਕਸ਼ਨ ਫਾਰਮੇਸ਼ਨ ਬਾਰੇ ਜਾਣਕਾਰੀ ਦਿੰਦਿਆਂ ਅਤੇ ਦੁਸ਼ਮਣ ਦੀ ਚੌਕੀ ਨਸ਼ਟ ਕਰਨ ਦਾ ਪ੍ਰਦਰਸ਼ਨ ਕਰਵਾਉਂਦੇ ਹੋਏ ਜੰਗੀ ਮਹੌਲ ਦਾ ਅਨੁਭਵ ਦਿਵਾਇਆ ਗਿਆ, ਤਾਂ ਉਥੇ ਮੌਜੂਦ ਹਰ ਕੈਡਟ ਦੇ ਰੋਮ-ਰੋਮ ਖੜੇ ਹੋ ਗਏ।
ਜਨਰਲ ਅਧਿਕਾਰੀ ਚੀਮਾ ਨੂੰ ਹੋਰ ਦੱਸਿਆ ਗਿਆ ਕਿ ਹੁਣ ਤੱਕ ਕੈਂਪ ਵਿਚ ਵੇਪਨ ਹੈਂਡਲਿੰਗ ਦਾ ਇੰਟਰ ਕੰਪਨੀ ਮੁਕਾਬਲਾ ਹੋ ਚੁੱਕਾ ਹੈ। ਕੈਡਟਸ ਨੂੰ ਪੰਜਾਬੀ ਸਭਿਆਚਾਰ ਨਾਲ ਜੋੜਦਿਆਂ ਪੱਗ ਬੰਨ੍ਹਣ ਦਾ ਮੁਕਾਬਲਾ ਵੀ ਕਰਵਾਇਆ ਗਿਆ। ਮੌਜੂਦਾ ਸਮੇਂ ਵਿਚ ਇੰਟਰ ਕੰਪਨੀ ਬਾਸਕਟਬਾਲ, ਵਾਲੀਬਾਲ ਅਤੇ ਟਗ ਆਫ ਵਾਰ ਦੇ ਮੁਕਾਬਲੇ ਚੱਲ ਰਹੇ ਹਨ। ਕੈਂਪ ਦੇ ਨੌਵੇਂ ਦਿਨ, ਸਾਰਿਆਂ ਦੇ ਆਕਰਸ਼ਣ ਦਾ ਕੇਂਦਰ ਬਣੇ ਡ੍ਰਿੱਲ ਮੁਕਾਬਲੇ ਲਈ ਹਰ ਕੰਪਨੀ ਦੇ ਕੈਡਟਸ ਦਿਲੋਂ ਮਿਹਨਤ ਕਰ ਰਹੇ ਹਨ।
ਇਸ ਤੋਂ ਬਾਅਦ ਮੈਜਰ ਜਨਰਲ ਚੀਮਾ ਨੇ ਕੈਡਟਸ ਨਾਲ ਕੈਂਪ ਵਿਚ ਉਨ੍ਹਾਂ ਦੀ ਟ੍ਰੇਨਿੰਗ ਬਾਰੇ ਰੁਚਿਕਰ ਗੱਲਬਾਤ ਕੀਤੀ। ਉਨ੍ਹਾਂ ਨੇ ਐਨਸੀਸੀ ਦੇ ਇਸ ਸਾਲਾਨਾ ਸੈਸ਼ਨ ਵਿਚ ਉਤਕ੍ਰਿਸ਼ਟ ਪ੍ਰਦਰਸ਼ਨ ਕਰਨ ਵਾਲੇ ਏਐਨਓਜ਼, ਪ੍ਰਸ਼ਿਕਸ਼ਕਾਂ ਅਤੇ ਕੈਡਟਸ ਨੂੰ ਸਨਮਾਨਤ ਵੀ ਕੀਤਾ। ਇਸ ਸਮਾਰੋਹ ਦਾ ਸਮਾਪਨ ਐਨ.ਸੀ.ਸੀ. ਗੀਤ ਅਤੇ “ਭਾਰਤ ਮਾਤਾ ਕੀ ਜੈ” ਦੇ ਨਾਅਰਿਆਂ ਨਾਲ ਹੋਇਆ।
ਫਿਰ ਜਨਰਲ ਅਧਿਕਾਰੀ ਚੀਮਾ ਸੀਟੀ ਇੰਸਟੀਚਿਊਟ ਦੇ ਚੇਅਰਮੈਨ ਸਰਦਾਰ ਚਰਨਜੀਤ ਸਿੰਘ ਚੰਨੀ, ਵਾਈਸ ਚੇਅਰਮੈਨ ਹਰਪ੍ਰੀਤ ਸਿੰਘ ਅਤੇ ਐਮਡੀ ਮਨਵੀਰ ਸਿੰਘ ਨਾਲ ਉਨ੍ਹਾਂ ਦੇ ਦਫਤਰ ਵਿਚ ਮਿਲਣ ਪਹੁੰਚੇ। ਵਾਈਸ ਚੇਅਰਮੈਨ ਹਰਪ੍ਰੀਤ ਸਿੰਘ ਵਲੋਂ ਸੀਟੀ ਇੰਸਟੀਚਿਊਟ ਨੂੰ ਐਨਸੀਸੀ ਕੈਂਪ ਸਥਾਨ ਵਜੋਂ ਚੁਣਨ ਲਈ ਫੌਜ ਦਾ ਧੰਨਵਾਦ ਕੀਤਾ ਗਿਆ ਅਤੇ ਭਵਿੱਖ ਵਿਚ ਵੀ ਹੋਣ ਵਾਲੇ ਐਨਸੀਸੀ ਕੈਂਪਾਂ ਲਈ ਪੂਰਾ ਸਹਿਯੋਗ ਦੇਣ ਦਾ ਵਿਸ਼ਵਾਸ ਦਿਵਾਇਆ ਗਿਆ। ਇਸ ਤੋਂ ਬਾਅਦ ਫੌਜੀ ਅਧਿਕਾਰੀਆਂ ਅਤੇ ਸੀਟੀ ਇੰਸਟੀਚਿਊਟ ਪ੍ਰਬੰਧਨ ਵਲੋਂ ਕੈਡਟਸ ਦੇ ਨਾਲ ਇੱਕ ਯਾਦਗਾਰ ਗਰੁੱਪ ਫੋਟੋ ਖਿੱਚਵਾਈ ਗਈ।
ਮੇਜਰ ਜਨਰਲ ਜੇ.ਐੱਸ. ਚੀਮਾ ਨੇ ਕੈਡਟਸ ਨੂੰ ਕੈਂਪ ਵਿਚ ਦਿੱਤੀ ਜਾ ਰਹੀ ਉੱਚ ਦਰਜੇ ਦੀ ਗਹਿਰੀ ਟ੍ਰੇਨਿੰਗ, ਭੋਜਨ ਅਤੇ ਹੋਰ ਗਤਿਵਿਧੀਆਂ ‘ਤੇ ਸੰਤੋਸ਼ ਜਤਾਇਆ।
