ਪੈਰਿਸ, (PRIME INDIAN NEWS) :- ਪੈਰਿਸ ਤੋਂ ਮਨੁੱਖੀ ਅਧਿਕਾਰਾਂ ਦੀ ਸੰਸਥਾ ਔਰਰ-ਡਾਨ ਦੇ ਮੁੱਖੀ ਸ. ਇਕਬਾਲ ਸਿੰਘ ਭੱਟੀ ਨੇ ਬਹੁਤ ਹੀ ਨਿਮਰਤਾ ਸਾਹਿਤ ਅਤੇ ਅਦਨੇ ਸਿੱਖ ਦੀ ਤਰਾਂ, ਉਨ੍ਹਾਂ ਆਗੂਆਂ ਨੂੰ ਬੇਨਤੀ ਕੀਤੀ ਹੈ, ਜਿਨ੍ਹਾਂ ਨੇ ਸ੍ਰੀ ਅਕਾਲ ਤਖਤ ਸਾਹਿਬ ਜੀ ਦੇ ਜਥੇਦਾਰ ਸਾਹਿਬ ਵੱਲੋਂ ਦਿੱਤੇ ਆਦੇਸ਼ ਉੱਪਰ ਕਿੰਤੂ ਪ੍ਰੰਤੂ ਕੀਤਾ ਹੈ। ਕੀ?? ਅਸੀਂ ਸਿੰਘ ਸਾਹਿਬ ਜੀ ਨੂੰ ਇਤਨੇ ਕਮਜ਼ੋਰ ਅਤੇ ਲਾਈਲੱਗ ਸਮਝਦੇ ਹਾਂ ਕਿ ਉਹ ਕਿਸੇ ਰਾਜਨੀਤਿਕ ਵਿਅਕਤੀ ਦੇ ਆਖੇ ਲੱਗ ਕੇ, ਕਿਸੇ ਦੇ ਵਿਰੁੱਧ ਆਦੇਸ਼ ਜਾਰੀ ਕਰ ਦੇਣਗੇ, ਇਹ ਕਦੇ ਨਹੀਂ ਹੋ ਸੱਕਦਾ, ਇਹ ਸੋਚ ਸਿਰਫ ਉਨ੍ਹਾਂ ਵਿਅਕਤੀਆਂ ਅਤੇ ਬਾਗੀ ਲੀਡਰਾਂ ਦੀ ਹੀ ਹੈ ਜਿਹੜੇ ਅਕਾਲੀ ਦਲ ਛੱਡ ਕੇ ਹੋਰਨਾਂ ਪਾਰਟੀਆਂ ਦੇ ਪਿੱਠੁ ਬਣ ਚੁੱਕੇ ਹਨ।
ਜ਼ੇਕਰ ਅਸੀਂ ਆਪਣੇ ਧਰਮ, ਬਾਣੀ ਅਤੇ ਬਾਣੇ ਤੇ ਨਿਸ਼ਠਾ ਰੱਖਦੇ ਹੋਏ ਸ਼੍ਰੀ ਅਕਾਲ ਤਖਤ ਸਾਹਿਬ ਜੀ ਨੂੰ ਸੀਸ ਝੁਕਾਉਂਦੇ ਹਾਂ, ਤਾਂ ਸਾਨੂੰ ਸ੍ਰੀ ਅਕਾਲ ਤਖਤ ਸਾਹਿਬ ਜੀ ਦੇ ਜਥੇਦਾਰ ਸਾਹਿਬ ਉੱਪਰ ਸ਼ੱਕ ਪ੍ਰਗਟਾਉਣ ਦਾ ਵੀ ਹੱਕ ਨਹੀਂ ਬਣਦਾ। ਹੋਰਨਾਂ ਧਰਮਾਂ ਨੂੰ ਦੇਖੋ, ਉਹ ਕਦੇ ਵੀ ਆਪਣੇ ਈਸ਼ਟ ਜਾਂ ਧਰਮ ਦੇ ਮੋਢੀਆਂ ਉੱਪਰ ਸੁਆਲ ਨਹੀਂ ਕਰਦੇ, ਲੇਕਿਨ ਅਸੀਂ ਬਿਨਾਂ ਸੋਚੇ ਸਮਝੇ ਸਿੱਧਾ ਸ੍ਰੀ ਅਕਾਲ ਤਖਤ ਸਾਹਿਬ ਨੂੰ ਹੀ ਨਿਸ਼ਾਨੇ ਤੇ ਲੈ ਲੈਂਦੇ ਹਾਂ, ਇਹ ਨਹੀਂ ਹੋਣਾ ਚਾਹੀਦਾ।
ਬੰਦੀ ਸਿੰਘ ਅਸੀਂ ਨਹੀਂ ਛੁਡਾ ਸਕੇ, ਜਿਹੜੇ ਕਿ ਸਾਡੀ ਖਾਤਿਰ ਕੁਰਬਾਨੀਆਂ ਕਰਕੇ ਜੇਲ੍ਹਾਂ ਵਿੱਚ ਬੈਠੇ ਹਨ। ਦੂਜੇ ਪਾਸੇ ਏਕਾ ਹੋਣ ਕਰਕੇ ਰਾਮ ਰਹੀਮ ਹਰ ਤੀਜੇ ਦਿਨ ਪੈਰੋਲ ਤੇ ਬਾਹਰ ਆਂ ਜਾਂਦਾ ਹੈ। ਘਰ ਦੇ ਨਿਆਣੇ ਬੇਸ਼ੱਕ ਸਾਡੇ ਆਖੇ ਨਾਂ ਲੱਗਦੇ ਹੋਣ, ਜਾਂ ਫਿਰ ਉਹ ਸਾਡਾ ਕਹਿਣਾ ਨਾਂ ਮੰਨਦੇ ਹੋਣ, ਲੇਕਿਨ ਸੁਆਲ ਅਸੀਂ ਸਿੱਧਾ ਜਥੇਦਾਰ ਸਾਹਿਬ ਜੀ ਨੂੰ ਕਰਨਾ ਹੁੰਦਾ ਹੈ। ਹੁਣ ਜ਼ੇਕਰ ਕੋਈ ਆਦੇਸ਼ ਜਾਰੀ ਹੋਇਆ ਹੈ ਤਾਂ ਉਸਦਾ ਜੁਆਬ ਸਬੰਧਿਤ ਵਿਅਕਤੀ ਆਪੇ ਦੇ ਦੇਵੇਗਾ। ਥੋੜਾ ਇੰਤਜਾਰ ਤਾਂ ਕਰੀਏ। ਜਥੇਦਾਰ ਸਾਹਿਬ ਬਿਨਾਂ ਕਸੂਰ ਤੋਂ ਕਿਸੇ ਨੂੰ ਧਾਰਮਿਕ ਸਜ਼ਾ ਨਹੀਂ ਸੁਣਾਉਣ ਲੱਗੇ, ਕਿਉਂਕਿ ਉਹ ਸਾਡੇ ਸਭਨਾਂ ਦੇ ਸਤਿਕਾਰਿਤ ਸਿੰਘ ਸਾਹਿਬ ਜੀ ਹਨ। ਦੂਸਰਾ ਜਿਸ ਪਦਵੀ ਤੇ ਉਹ ਬੈਠੇ ਹਨ, ਉਸ ਪਦਵੀ ਦਾ ਸਤਿਕਾਰ ਕਰਨਾ ਸਾਡਾ ਸਾਰਿਆਂ ਦਾ ਸਾਂਝਾ ਫਰਜ ਬਣਦਾ ਹੈ, ਨਾਂ ਕਿ ਵਕਤ ਤੋਂ ਪਹਿਲਾਂ ਕੋਈ ਸੁਆਲ ਕਰਨਾ।
ਵੈਸੇ ਇਹ ਸਾਰਾ ਕੀਤਾ ਕਰਾਇਆ, ਸਾਡਾ ਆਪਣਾ ਹੀ ਹੈ, ਇਕੱਲੇ ਸੁਖਬੀਰ ਸਿੰਘ ਬਾਦਲ ਨੂੰ ਨੀਵਾਂ ਦਿਖਾਉਣ ਅਤੇ ਸਿਆਸਤ ਤੋਂ ਲਾਂਭੇ ਕਰਨ ਵਾਸਤੇ ਸ੍ਰੀ ਅਕਾਲ ਤਖਤ ਸਾਹਿਬ ਤੇ ਸ਼ਿਕਾਇਤ ਕਰਨ ਵਾਲੇ ਵੀ ਸਾਡੇ ਆਪਣੇ ਹੀ ਵੀਰ ਸਨ, ਤੇ ਜੱਦ ਹੁਣ, ਉਸ ਕੇਸ ਦੀ ਫਰੋਲਾ ਫਰਾਲੀ ਕਰਦੇ ਵਕਤ ਸਿੰਘ ਸਾਹਿਬ ਨੂੰ ਕੁੱਝ ਹੋਰ ਰਾਜਨੀਤੀਵਾਨ ਵੀ ਸ਼ੱਕੀ ਦਿਖਾਈ ਦਿੱਤੇ, ਤਾਂ ਉਨ੍ਹਾਂ ਨੇ 16 ਹੋਰ ਰਾਜਨੀਤਿਕ ਲੀਡਰਾਂ ਨੂੰ ਵੀ, ਅਕਾਲੀ ਸੁਧਾਰ ਲਹਿਰ ਵਾਲਿਆਂ ਵੱਲੋਂ ਕੀਤੀ ਗਈ ਸ਼ਿਕਾਇਤ ਦੇ ਖਰੜੇ ਨੂੰ ਪੜ ਕੇ, ਥੋੜੇ ਬਹੁਤ ਦੋਸ਼ੀ ਗ੍ਰਦਾਨ ਦਿੱਤਾ ਹੈ, ਤਾਂ ਇਸ ਵਿੱਚ ਸ਼੍ਰੋਮਣੀ ਅਕਾਲੀ ਦਲ ਦਾ ਨਾਮ ਕਿੱਥੋਂ ਆ ਗਿਆ। ਇਸ ਚੀਜ ਦੀ ਸਾਨੂੰ ਸਮਝ ਹੋਣੀ ਚਾਹੀਦੀ ਹੈ।
ਪਹਿਲਾਂ ਹੀ ਸੁਖਬੀਰ ਸਿੰਘ ਬਾਦਲ ਨੂੰ ਫਸਾਉਂਦੇ ਫਸਾਉਂਦੇ 16 ਫਸ ਚੁੱਕੇ ਹਨ ਅਤੇ ਜੇਕਰ ਕੱਲ ਨੂੰ ਆਹ ਜਿਹੜੇ ਸ੍ਰੀ ਅਕਾਲ ਤਖਤ ਸਾਹਿਬ ਜੀ ਦੇ ਜਥੇਦਾਰ ਸਾਹਿਬ ਜੀ ਦੇ ਆਦੇਸ਼ ਉੱਪਰ ਉਂਗਲਾਂ ਚੁੱਕ ਰਹੇ ਹਨ, ਤਾਂ ਹੋ ਸੱਕਦਾ ਹੈ, ਸ੍ਰੀ ਅਕਾਲ ਤਖਤ ਸਾਹਿਬ ਜੀ ਦੀ ਮਾਣ ਮਰਿਯਾਦਾ ਕਾਇਮ ਰੱਖਣ ਵਾਸਤੇ ਇਨ੍ਹਾਂ ਵਿੱਚੋਂ ਵੀ ਕਿਸੇ ਨੇ ਆਦੇਸ਼ ਜਾਰੀ ਹੋ ਜਾਵੇ ਤਾਂ ਇਹ ਫਿਰ ਕਹਿਣਗੇ ਕਿ ਜਥੇਦਾਰ ਸਾਹਿਬ ਰਾਜਨੀਤਿਕ ਪਾਰਟੀ ਦੀ ਤਰਫਦਾਰੀ ਕਰ ਰਹੇ ਹਨ। ਮੈਂ ਆਪਣੀ ਸੋਚ, ਜਿਹੜੀ ਕਿ ਸ੍ਰੀ ਅਕਾਲ ਤਖਤ ਸਾਹਿਬ ਜੀ ਨੂੰ ਸਮਰਪਿਤ ਹੈ, ਦੇ ਅਧੀਨ ਲਿਖਿਆ ਹੈ, ਇਹ ਕਿਸੇ ਹੋਰ ਦੀ ਸੋਚ ਮੁਤਾਬਿਕ ਨਹੀਂ ਲਿਖਿਆ, ਅਗਰ ਕਿਸੇ ਦੇ ਦਿੱਲ ਨੂੰ ਮੇਰੀ ਇਸ ਲਿਖਾਵਟ ਨਾਲ ਠੇਸ ਪਹੁੰਚੀ ਹੋਵੇ ਤਾਂ ਮੈਂ ਖਿਮਾਂ ਦਾ ਜਾਚਕ ਹਾਂ।
