ਕਿਹਾ – ਭਗਵੰਤ ਮਾਨ ਅਤੇ ਕੇਜਰੀਵਾਲ ਦੀ ਕਹਿਣੀ ਅਤੇ ਕਰਨੀ ਵਿੱਚ ਫਰਕ , ਪੰਜਾਬ ਵਾਸੀ ਹੁਣ ਇਹਨਾ ਝੂਠੇ ਅਤੇ ਡਰਾਮੇਬਾਜ਼ ਲੀਡਰਾਂ ਦੇ ਝਾਂਸੇ ਵਿੱਚ ਕਦੇ ਵੀ ਨਹੀਂ ਆਉਣਗੇ
ਪੈਰਿਸ, (PRIME INDIAN NEWS) :- ਸ਼੍ਰੋਮਣੀ ਅਕਾਲੀ ਦਲ ਯੂਰਪ ਦੇ ਪ੍ਰਧਾਨ ਇਕਬਾਲ ਸਿੰਘ ਭੱਟੀ ਨੇ 15 ਅਗਸਤ ਆਜ਼ਾਦੀ ਦਿਹਾੜੇ ਤੇ ਮੁੱਖਮੰਤਰੀ ਭਗਵੰਤ ਮਾਨ ਵਲੋਂ ਬੁਲੇਟ ਪਰੂਫ ਕੈਬਿਨ ਵਿੱਚ ਖੜ ਕੇ ਭਾਸ਼ਣ ਦੇਣ ਤੇ ਹੈਰਾਨਗੀ ਪ੍ਰਗਟਾਈ ਹੈ। ਉਨ੍ਹਾਂ ਨੇ ਮੀਡੀਆ ਨਾਲ ਗੱਲਬਾਤ ਕਰਦਿਆਂ ਕਿਹਾ ਕੀ? ਇਹ, ਉਹ ਭਗਵੰਤ ਮਾਨ ਹੀ ਹੈ, ਜਿਹੜਾ ਕਹਿੰਦਾ ਹੁੰਦਾ ਸੀ ਕਿ ਜੇਕਰ ਸੁਖਬੀਰ ਅਤੇ ਕੈਪਟਨ ਨੂੰ ਲੋਕਾਂ ਤੋੰ ਇਤਨਾ ਹੀ ਡਰ ਲੱਗਦਾ ਹੈ ਤਾਂ ਉਹ ਰਾਜਨੀਤੀ ਛੱਡ ਕੇ ਸਬਜ਼ੀਆਂ ਵੇਚਣ ਵਾਲੀਆਂ ਰੇੜੀਆਂ ਲਗਾ ਲੈਣ।
ਉਨ੍ਹਾਂ ਕਿਹਾ ਕਿ ਭਗਵੰਤ ਮਾਨ ਦੇ ਮੁੱਖ ਮੰਤਰੀ ਬਣਨ ਤੋੰ ਪਹਿਲਾਂ ਇਹ ਬਿਆਨ ਆਉਂਦੇ ਹੁੰਦੇ ਸਨ ਕਿ ਉਪਰੋਕਤ ਦੋਵੇਂ ਰਾਜਨੀਤੀਵਾਨ ਆਪਣੀ ਹਿਫਾਜਤ ਵਾਸਤੇ ਹਮੇਸ਼ਾਂ 100-100 ਮੁਲਾਜ਼ਮਾਂ ਦੀ ਸਕਿਉਰਿਟੀ ਦੀ ਛਤਰ ਛਾਇਆ ਹੇਠ ਕਿਉਂ ਰਹਿੰਦੇ ਹਨ, ਦੂਸਰਾ ਸਕਿਉਰਿਟੀ ਉੱਪਰ ਇਹ ਪੰਜਾਬ ਦਾ ਪੈਸਾ ਬਰਬਾਦ ਕਰ ਰਹੇ ਹਨ। ਸਾਡੀ ਸਰਕਾਰ ਆ ਲੈਣ ਦਿਉ, ਦੇਖਿਉ ਸਕਿਉਰਿਟੀ ਤੋੰ ਬਿਨਾਂ ਅਸੀਂ ਕਿਵੇਂ ਬੇਖੌਫ ਘੁੰਮਦੇ ਹਾਂ। ਹੁਣ ਇਹ ਮਾਈ ਦਾ ਲਾਲ ਭਾਸ਼ਣ ਵੀ ਬੰਦ ਕੈਬਿਨਾਂ ਵਿੱਚ 300 ਮੁਲਾਜ਼ਮਾਂ ਦੀ ਸਕਿਉਰਿਟੀ ਦੀ ਹਾਜ਼ਰੀ ਵਿੱਚ ਦਿੰਦਾ ਹੈ, ਉੱਪਰੋਂ ਘਰ ਵਾਲੀ ਦੀ ਸੁਰੱਖਿਆ ਕਿਧਰੇ ਵੱਧ ਹੈ।
ਇਕਬਾਲ ਸਿੰਘ ਭੱਟੀ ਨੇ ਕਿਹਾ ਕਿ ਸਤ੍ਹਾ ਹਥਿਆਉਣ ਦੇ ਲਾਲਚੀ ਇਸ ਭਗਵੰਤ ਮਾਨ ਨੇ ਜਿਤਨਾ ਪੰਜਾਬ ਦੀ ਭੋਲੀ ਭਾਲੀ ਜਨਤਾ ਨੂੰ ਗੁੰਮਰਾਹ ਕੀਤਾ ਹੈ, ਸ਼ਾਇਦ ਹੀ ਇਤਿਹਾਸ ਵਿੱਚ ਅਜਿਹੀ ਕੋਈ ਉਦਾਹਰਣ ਹੋਵੇ। ਮੈਂ ਪੰਜਾਬ ਦੀ ਜਨਤਾ ਨੂੰ ਯਾਦ ਕਰਵਾਉਣਾ ਚਾਹੁੰਦਾ ਹਾਂ ਕਿ ਦੇਖੋ ਭਗਵੰਤ ਮਾਨ ਅਤੇ ਕੇਜਰੀਵਾਲ ਦੀ ਕਹਿਣੀ ਅਤੇ ਕਰਨੀ ਵਿੱਚ ਕਿਤਨਾ ਫਰਕ ਹੈ। ਉਨ੍ਹਾਂ ਕਿਹਾ ਕਿ ਪੰਜਾਬ ਵਾਸੀ ਹੁਣ ਇਹਨਾ ਝੂਠੇ ਅਤੇ ਡਰਾਮੇਬਾਜ਼ ਲੀਡਰਾਂ ਦੇ ਝਾਂਸੇ ਵਿੱਚ ਕਦੇ ਵੀ ਨਹੀਂ ਆਉਣਗੇ।
