ਜਲੰਧਰ, ਐਚ ਐਸ ਚਾਵਲਾ। ਡੀ ਏ ਵੀ ਇੰਸਟੀਚਿਊਟ ਆਫ਼ ਇੰਜਨੀਅਰਿੰਗ ਐਂਡ ਟੈਕਨਾਲੋਜੀ ਵਿਖੇ 2 ਪੰਜਾਬ ਐੱਨਸੀਸੀ ਬਟਾਲੀਅਨ ਦੀ ਅਗਵਾਈ ਹੇਠ ਦਸ ਰੋਜ਼ਾ ਗਣਤੰਤਰ ਦਿਵਸ ਦੀ ਤਿਆਰੀ ਵਾਸਤੇ ਤੀਜਾ ਅਤੇ ਸਾਂਝਾਂ ਸਾਲਾਨਾ ਕੈਂਪ ਸਮਾਪਤ ਹੋ ਗਿਆ ਹੈ। ਰਾਤ ਅਤੇ ਦਿਨ ਦੇ ਕੈਂਪ ਵਿੱਚ 600 ਐੱਨਸੀਸੀ ਕੈਡਿਟਾਂ ਨੇ ਮਿਲਟਰੀ ਟਰੇਨਿੰਗ ਅਤੇ ਐੱਨਸੀਸੀ ਪਾਠਕ੍ਰਮ ਨੂੰ ਡੂੰਘਾਈ ਨਾਲ ਸਿੱਖਿਆ ਅਤੇ ਇਸ ਨੂੰ ਜੀਵਨ ਵਿੱਚ ਅਪਣਾਉਣ ਦਾ ਸੰਕਲਪ ਲਿਆ।
ਟਰੇਨਿੰਗ ਦੇ ਨੌਵੇਂ ਦਿਨ ਇੰਟਰ ਕੰਪਨੀ ਡਰਿੱਲ ਮੁਕਾਬਲਾ ਕਰਵਾਇਆ ਗਿਆ। ਸਾਰੇ ਕੈਡਿਟਾਂ ਨੇ ਡਰਿੱਲ ਮੁਕਾਬਲੇ ਦੇ ਵੱਖ-ਵੱਖ ਵਰਗਾਂ ਵਿੱਚ ਭਾਗ ਲਿਆ। ਕੈਡਿਟਾਂ ਨੂੰ ਕੁਆਟਰ ਗਾਰਡ ਨਿਰੀਖਣ ਅਤੇ ਇਸ ਦੀ ਮਹੱਤਤਾ ਬਾਰੇ ਵਿਸਥਾਰ ਨਾਲ ਦੱਸਿਆ ਗਿਆ। ਸ਼ਾਮ ਨੂੰ ਵੱਖ-ਵੱਖ ਸੱਭਿਆਚਾਰਕ ਮੁਕਾਬਲੇ ਕਰਵਾਏ ਗਏ ਅਤੇ ਜੇਤੂ ਟੀਮਾਂ ਅਤੇ ਕੈਡਿਟਾਂ ਨੂੰ ਇਨਾਮ ਦੇ ਕੇ ਸਨਮਾਨਿਤ ਕੀਤਾ ਗਿਆ।
ਸੱਭਿਆਚਾਰਕ ਪ੍ਰੋਗਰਾਮ ਦੇ ਮੁੱਖ ਮਹਿਮਾਨ ਡਾ. ਸੁਧੀਰ ਸ਼ਰਮਾ, ਪ੍ਰਿੰਸੀਪਲ, ਡੀਏਵੀ ਇੰਸਟੀਚਿਊਟ ਆਫ਼ ਇੰਜਨੀਅਰਿੰਗ ਐਂਡ ਟੈਕਨਾਲੋਜੀ ਅਤੇ ਕਰਨਲ ਐੱਮ ਐੱਸ ਸਚਦੇਵ, ਕਮਾਂਡਿੰਗ ਅਫ਼ਸਰ, 2 ਪੰਜਾਬ ਐੱਨਸੀਸੀ ਗਰਲਜ਼ ਬਟਾਲੀਅਨ ਸਨ। ਉਨ੍ਹਾਂ ਨੇ ਦਸ ਰੋਜ਼ਾ ਐੱਨਸੀਸੀ ਕੈਂਪ ਵਿੱਚ ਵਧੀਆ ਪ੍ਰਦਰਸ਼ਨ ਕਰਨ ਵਾਲੀਆਂ ਵਿਦਿਆਰਥਣਾਂ ਨੂੰ ਸਨਮਾਨਿਤ ਕੀਤਾ। ਕੈਂਪ ਦੇ ਸਮਾਪਤੀ ਭਾਸ਼ਣ ਵਿੱਚ ਕੈਂਪ ਕਮਾਂਡੈਂਟ ਕਰਨਲ ਵਿਨੋਦ ਜੋਸ਼ੀ ਨੇ ਕਿਹਾ ਕਿ ਭਵਿੱਖ ਵਿੱਚ ਇਮਾਨਦਾਰ ਅਤੇ ਜ਼ਿੰਮੇਵਾਰ ਨਾਗਰਿਕ ਬਣੋ। ਸ਼ਖਸੀਅਤ ਵਿਕਾਸ, ਖੇਡਾਂ, ਸੱਭਿਆਚਾਰਕ ਮੁਕਾਬਲਿਆਂ ਵਿੱਚ ਭਾਗ ਲਓ ਅਤੇ ਆਪਣੇ ਹੁਨਰ ਨੂੰ ਤਿੱਖਾ ਕਰੋ। ਉਨ੍ਹਾਂ ਕਿਹਾ ਕਿ ਹਰ ਕੈਡਿਟ ਹਥਿਆਰਾਂ ਦੀ ਮਸ਼ਕ, ਡ੍ਰਿਲ ਦੀ ਮਸ਼ਕ, ਅਤੇ ਹਥਿਆਰਾਂ ਨੂੰ ਖੋਲਣ ਤੇ ਜੋੜਨ ਦੀ ਮਸ਼ਕ ਵਿੱਚ ਸੁਧਾਰ ਕਰੇ ਤਾਂ ਜੋ ਉਹ ਐੱਨ ਸੀ ਸੀ ਪ੍ਰੀਖਿਆਵਾਂ ਵਿੱਚ ਵਧੀਆ ਪ੍ਰਦਰਸ਼ਨ ਕਰ ਸਕਣ।
ਕੈਂਪ ਕਮਾਂਡੈਂਟ ਕਰਨਲ ਜੋਸ਼ੀ ਨੇ ਡੀਏਵੀ ਇੰਸਟੀਚਿਊਟ ਆਫ਼ ਇੰਜਨੀਅਰਿੰਗ ਐਂਡ ਟੈਕਨਾਲੋਜੀ ਦੇ ਅਸੋਸੀਏਟ ਐੱਨ ਸੀ ਸੀ ਅਫ਼ਸਰਾਂ, ਬਟਾਲੀਅਨ ਹੈੱਡਕੁਆਰਟਰ ਦੇ ਆਰਮੀ ਟਰੇਨਰਾਂ, ਸਿਵਲ ਸਟਾਫ਼ ਅਤੇ ਹੋਰ ਯੂਨਿਟਾਂ ਦੇ ਟ੍ਰੇਨਰਾਂ ਦਾ ਦੇਸ਼ ਦੇ ਭਵਿੱਖ ਲਈ ਚੰਗੀ ਸਿਖਲਾਈ ਪ੍ਰਦਾਨ ਕਰਨ ਵਿੱਚ ਸਫ਼ਲ ਹੋਣ ਲਈ ਧੰਨਵਾਦ ਕੀਤਾ। ਕਰਨਲ ਵਿਨੋਦ ਜੋਸ਼ੀ ਨੇ ਕਿਹਾ ਕਿ ਦਿੱਲੀ ਵਿੱਚ ਗਣਤੰਤਰ ਦਿਵਸ ਦੇ ਮੁਕਾਬਲਿਆਂ ਵਿੱਚ ਵੱਧ ਤੋਂ ਵੱਧ ਕੈਡਿਟਾਂ ਦਾ ਚੁਣਿਆ ਜਾਣਾ ਸਾਡੇ ਲਈ ਮਾਣ ਵਾਲੀ ਗੱਲ ਹੋਵੇਗੀ।
